主题：最近看到的笑话之七 -- 钛豌豆
伊跟平常一样，立在楼梯口先拿当初修个栋公房的人骂得来臭要死，再拿钥匙开门。
台子上多出来一面镜子。
就是个种推车子摊头上卖的，咪咪小跟手掌心差勿多大的，跟绒线针一道买好给侬便宜的，小镜子。
余彩琴想老头啥辰光会买个种物什了，阿是要花嚓嚓，送给跳交谊舞的搭子。
伊就拿起镜子来看一交，镜子突然之间一亮，上头出来一个小人，跟手指拇头差勿多大，开口就讲：“您好，我是被封在镜子中的魔灵，感谢您解放了我，我可以为您满足三个愿望，您有什么想要的吗？”
余彩琴听大勿懂伊在讲啥，就问伊：“侬好讲上海话伐？”
小人点点头讲：“好的，个是第一只愿望，个么阿姨侬的第二只愿望是啥呢？”
余彩琴讲：“啊个就第一只没啦，侬虚假广告嘛，侬领导啥人啊，我要投诉侬，现在消保委老结棍的侬晓得伐，顶少让侬扣一个号头工资。”
小人被机关枪轰得要哭出来快了，就讲：“阿姨侬勿要投诉我，我也是第一趟做个生活，要么刚刚个只勿算了，帮侬还是算三只。”
余彩琴满意了，讲：“个还差勿多。个么侬既然好满足我愿望，我就先试试看，我要个老公房装新电梯好了。”
小人讲：“个算啥事体，马上帮侬办好。”
余彩琴就觉着楼抖了抖，小人讲：“阿姨已经好了，侬出门看一交。”
余彩琴拿镜子摆在袋袋里，出门去看。果然一部新电梯，拆骨里新，走进去亮堂堂，揿一记到一楼飞快，余彩琴满意了。
小人在袋袋里讲：“阿姨侬满意了伐？第二只愿望是啥？”
余彩琴拿出镜子来，讲：“个就算第一只啦？个是试吃侬晓得伐，买葡萄买荔枝买橘子全好拿一只吃吃看，不甜不要钞票的，算送的，侬个也是试吃。”
小人真的哭了，讲：“阿姨侬伐好个能的，我一共也就三只的本事，侬刚刚试一试拿我三分之一全去掉了，给侬试吃我要被领导骂山门的。”
余彩琴看小人哭了么也有点心软，想想看有部电梯是蛮便当的，老头风湿关节炎上楼梯便当交关，就讲：“好好好阿姨勿欺负侬了，第一只就第一只。”
小人又笑了，在镜子上头转了一圈，讲：“谢谢阿姨！”
余彩琴讲：“侬个小人嘴巴还蛮甜的。个么第二只愿望我要我个戆大儿子寻着份工作，月薪总归要五六千块朝上伐，顶好是国企，公务员更加好，离屋里厢近些，勿要太吃力，加薪加得多，勿加班。”
小人面孔全皱起来了：“阿姨世界上头要有个种工作我也要去了，啥人蹲在个的啊。”
余彩琴讲：“侬哪能个点本事也没，吹牛皮的本事倒蛮大的。”
小人想了半天讲：“阿姨要么勿是国企可以伐，现在国企改制，效益全推扳来兮的，勿要讲加薪，勿减薪也蛮好了。”
余彩琴讲：“个也有些道理，侬讲讲看啥工作。”
小人讲：“要么当个市长，虽然没加薪，但是起薪就一万多块，也可以了是伐。”
余彩琴辣一记头挞，小人哎哟一记躺在镜子上头起勿来：“阿姨侬做啥？”
余彩琴讲：“我个戆大儿子好当市长啊？没几天就被人家撸掉了，工资也勿一定拿得着。再讲侬要拿杨雄撸掉噶便当啊？”
小人讲：“可以让伊升级嘛，让韩正到中央去，市长位子正好空出来。”
余彩琴讲：“后头交关副市长轮得着我儿子啊？侬勿要瞎讲八讲，寻只普通工作就可以了。”
小人讲：“哦哦我想着了！个只顶灵的，阿姨侬儿子也一定欢喜！”
余彩琴讲：“啥工作？”
小人讲：“书店营业员，个书店效益蛮好的，而且在市中心，顶重要的是侬儿子一定欢喜。”
余彩琴想书店营业员虽然立柜台有点吃力，但是多看看书说勿定好让儿子有点文化，就讲：“好的，就个只伐。”
小人讲：“好的好的。”
突然之间电话响起来，余彩琴想儿子噶快就打电话来了，真是结棍。
伊跑过去接电话，果然是儿子。
儿子讲：“姆妈我寻着工作了！”
余彩琴讲：“好的呀，啥工作？”
儿子讲：“外文书店营业员，就在福州路上厢，近来兮的。”
余彩琴讲：“外文书店，侬英文个点点分数，拎得清爽伐？”
儿子讲：“勿要紧的，四楼勿讲英文，我有办法的。”
余彩琴想儿子大了，总算有点腔调了。
儿子讲：“好了姆妈我挂掉了，等些还要去单位培训，姆妈再会。”
余彩琴讲：“哦好的，刚刚上班，侬骨头收收紧，勿要被同事看笑话。”
儿子挂掉了。（注）
余彩琴转过来跟小人讲：“侬还是有点本事的嘛，我看伊开心得勿得了。”
小人蛮骄傲的：“我是蛮有本事的啊，阿姨侬要相信我。还有最后一只愿望，阿姨侬要啥？”
余彩琴讲：“已经最后一只啦？我想想看。”
小人讲：“勿要紧的，阿姨侬慢慢想好了，勿急的。”
余彩琴讲：“已经想好了。”
小人吓了一跳讲：“噶快？阿姨侬要许啥？”
余彩琴讲：“我要世界和平。”
小人戆特了，半日天才讲：“阿姨侬哪能一记头来只噶大的，我有点吃勿消。”
余彩琴也有点勿好意思，讲：“侬阿是勿来事？勿来事算了，阿姨调一只。”
小人讲：“个只来事倒是来事的，但是要花点辰光，我要和同事一道弄了。”
余彩琴讲：“哦侬个倒是蛮结棍的，好，阿姨等侬。”
小人掏出一部小手机，在微信群里厢发了只消息，转过来讲：“好，阿姨我要去了，今朝夜到头新闻侬应该就好看到世界和平了，阿姨再会。”
余彩琴讲：“啊侬个就要跑啦？”
小人讲：“对的，因为要本人到场签字，还要身份证原件复印件，蛮麻烦的。”
余彩琴讲：“哦，个侬去伐。”
小人挥挥手讲：“阿姨再会！”
余彩琴突然叫了一声：“等些！”
小人吓了一跳：“阿姨还有啥事体？”
余彩琴掏出安卓老年机讲：“来，微信扫一扫，加只好友。”
小人乱笑，讲：“阿姨侬还蛮时髦的嘛。”
夜到头六点半，余彩琴跟老头吃好夜饭，调到新闻综合频道看晚间新闻。晚间新闻个眼睛大得来吓煞人的女的主持人在讲：“今日北京时间下午四点左右，中东、非洲、东欧等多个战争地区上空出现一名亚裔中年妇女头像，看到头像的人纷纷放下武器，与敌人握手言和。据美联社称，他们采访到部分看到这一奇观的人员，他们均声称在看到这位妇女头像的同时，心中响起不明所以但使人宁静平和的语言，消弭了宗教和种族仇恨，使他们的心联为一体，觉得能够靠谈判与讨价还价解决相关问题。”
新闻上头放出来头像的照片，余彩琴一口茶差些喷出来。
是余彩琴微信头像，伊在鲁迅公园里厢让小姐妹拍的。
老头看看新闻，看看余彩琴，讲：“这照片阿是有点像侬？”
余彩琴讲：“好像是有点像，勿晓得哪能桩事体。”
老头又看看新闻，讲：“仔细看看好像又伐大像了。”
余彩琴突然想起来，问老头：“台子上厢个镜子阿是侬买的？”
老头讲：“侬勿是讲屋里厢绒线针断掉了吗，我去摊头上买了一把，老板讲加两块银钿送给我个镜子，我想蛮好，就买了。”
余彩琴讲：“侬又听信人家推销，被人家吃牢。”
老头刚刚想表态，余彩琴又讲：“勿过个趟个镜子买得蛮好。”
（注）如果对上海地理不熟悉的话，福州路外文书店四楼是Animate。
